التقييم 1/5

فكرة رائعة ضيعها استظراف الكاتب

لو يجوز نقول انها “رواية” فهي بلا أدنى شك 157 صفحة من “الألش” الرخيص والمشاهد المقززة والاحاديث التافهة. إيه كمية الهري دي؟! لأ وقال إيه عمل منها جزء ثاني بسبب نجاح الجزء الأول!!

الكتاب تافهة بدرجة رهيبة، مش لاقي كلام أعبّر بيه بصراحة. لغة عامية من النوعية الرديئة أوي، كأنك بتكتب بوستات على الفيسبوك حرفيًا أو بتعمل شات مع حد.

ولكن،

اللي فات ده حاجة واللي هاقوله ده حاجة تانية، الكتاب في أول صفحة (التي تحتوي على معلومات دار النشر والطباعة والتأليف وحقوق الملكية…الخ) مكتوب فيها السطر ده:

مراجعة لغوية: أحمد عبد المجيد

أنت بتتكلموا بجد؟! يعني لغة عامية وكمان في مُراجِع لغوي؟ ازاي يعني؟

أنا شاكك إنه كان بيراجع الأخطاء الإملائية بقى، ولو ده حقيقي فدي تبقى كارثة. إن الكاتب مش عارف يكتب كتاب باللغة العامة!

على كلاً، دي ثاني تجربة لي مع الكاتب (التجربة الأولى “حدث بالفعل”)، ورغم أنها كانت بنفس اللغة العامة ولكن أنا قولت ان السبب ان القصص اللي في الكتاب الاول عبارة عن تجميعة من تدوينات لأشخاص كتبوها على الانترنت فبالتالي مفيش مش مشكلة لو ترجمتها بنفس اللغة العامية. ولكن بصراحة التجربة دي أنا اتصدمت، أنا تخيلت ان هايبقى في مستوى أفضل بكتير، خاصة وإن الكتاب ده -حسب كلامهم- نجح أوي للدرجة اللي جعلت الكاتب يكتب جزء ثاني.

في النهاية، سأعطي الكاتب فرصة ثانية، ولن اعتبر ان كتابين كافيين للحكم عليه. وعندي أمل كبير أني أكسب محمد عصمت واستمتع به.

الغلاف فكرته حلوة.

التقييم 5/5

كان في رسَّام أصيب في طفولته بحادثة جعلته أخرس، وهذا الفنان أخرج كل موهبته من خلال الرسم على القماش ولكن بطريقة مختلفة. كان يرسم على القماش بدون فواصل، ليست لوحات ولكن عبارة عن رسمة طويلة لا تنتهي. ونجح في رسم 60 لفافة قماش بطول 4 كيلومتر.

الرواية هي رحلة الابناء في تجميع أعمال والدهم، والتي من خلالها أعادوا اكتشاف والدهم.

اللغة رائعة والترجمة التحفة للمُترجم “مارك جمال” جعلتني أشعر اني أقرأ الكتاب في لغته الأصلية وليس ترجمة عن الأسبانية.

الكتاب حجمه صغير ويمكن إنهائه في جلسة واحدة (كما فعلت أنا).

التقييم 3/5

أول مرة أقرأ حاجة لمحمد عصمت، وأنا كنت عرفته من خلال الفيس بوك والبوستات المرعبة اللي بيكتبها.

الكتاب زي الفيس ولكن كأنه بوستات أكبر شوية. عبارة عن تجميعة قصص رعب كتبها ناس على الإنترنت على انها حصلت لهم.

القصص فعلاً فيها رعب، ولكن مشكلتها انها رعب غربي، واللغة كمان مكتوبة بالعامية لأن النص الأصلي عبارة عن بوستات ناس كتبتها على النت.

الكتاب حلو، وأتمنى أن الكتاب يكون بدايتي في متابعة أعمال محمد عصمت.

الغلاف حلو.

لا يُنصح بقراءته لضعاف القلوب وممنوع قرائه الكتاب بالليل والدنيا هدوء.

التقييم 5/5

الرواية تدور أحداثها بين أفغانستان وأمريكا واليونان. هذه هي الرواية الثالثة والأخيرة لخالد حسيني ولي معه أيضاً.

أحب خالد الحسيني؛ لأنه يعرف يحكي قصة بشكل مختلف، يُظهر الجانب الإنساني بشكل مختلف، مثل الروائية إليف شافاق. ولديه قدرة مؤلمة على سرد مشاهد تقطع القلب.

الرواية يظهر فيها مشكلة الاختيارات الصعبة التي يُجبر عليها الإنسان. مرة تتعاطف مع البطل، ثم بعد قليل تكتشف صورة مختلفة نهائياً.

التقييم 5/5

الرواية أحلى من الفيلم، والكوميديا فيها أكتر من الفيلم. ولكن إحقاقاً للحق، الفيلم رائع أيضاً.

رحلة مؤثرة جمعت بين حبيبين تفرقهما الموت بعد معاناة طويلة مع مرض السرطان. حاول كبح دموعك أثناء القراءة.

التقييم 4/5

كتاب خفيف عن مشكلات الكتابة اللي بتقابل الكُتَّاب. وهو عبارة عن تجميع لمقالات منفصلة عن الكتابة والسينما والفن.

التقييم 5/5

“إن رَجْمَ الأنبياء وتشييد الكنائس في ذكراهم بعد ذلك، كان ولا يزال طريقةَ العالم عبر العصور. اليوم نحن نعبدُ المسيح، أمَّا المسيح الذي جاء في الجسد فقد صلَبْناه” – المهاتما غاندي

فيليب يانسي نشأ في بيئة متطرفة، وحتى دخوله كلية اللاهوت. ومن هناك بدأ فيليب رحلة مراجعة كبير لإيمانه ومعتقداته. ظل فيليب يانسي كما يقول يتعافى من الكنيسة طوال حياته، والشخصيات المذكورة في الكتاب كان لها أثر كبير على رحلته الإيمانية.

هناك 13 شخصية بين الأدب والسياسة والعلم. في الكتاب ستتعرف على جوانب كثيرة من تلك الشخصيات، وبالتأكيد هناك جوانب لم تكن تسمع عنها من قبل.

كتاب مهم، وفي رأيي سيوضح لك الجانب الإنساني في الإيمان المسيحي.

التقييم 5/5

الأب الغني والأب الفقير: ما يعلمه الأثرياء ولا يُعلمِّه الفقراء وأفراد الطبقة الوسطى لأبنائهم عن المال

لفترة طويلة مكنتش حابب أقرأ الكتاب لأني كنت أعتقد انه أحد كتب التنمية البشرية، ولكن في نهاية الأمر حبيت أديله فرصة. الكتاب حلو أوي من حيث المعلومات المالية وبيوضح لك الاخطاءا للي بنمارسها في حق أنفسنا واللي بتساهم بشكل كبير في وضعنا الاقتصادي.

الكتاب كمان بيوضح أمثلة حية من واقع المؤلف. أمثلة هو بنفسه قام بها. هايوضح لك الفرق بين الاصول والخصوم، هايوضح لك قوة تكوين الشركات والاستفادة من الاعفاءات الضريبية للشركات.

كتاب مهم اوي للناس اللي لسة بتبدأ حياتها علشان يبقى عندهم وعي بالتصرفات المالية اللي هايقوموا بها.

التقييم 5/5

من الكتب القليلة اللي الواحد استمتع بيها اثناء قرائتها، والكتاب فكرني بسلسلة الدكتور أحمد مستجير: “في بحور العلم”.

لغة سهلة وجميلة، وسرد مُفصَّل للحقائق العلمية، وكتابة المراجع باستمرار طوال الكتاب.

هاتكتشف كمية معلومات خاطئة كنت بتصدقها، مثل استخدام الانسان لـ 10% فقط من قدرات دماغه، أو ان الفص اليمين مسؤل عن حاجات وان الفص اليسار مسؤل عن حاجات أخرى، وأن الفكرة بتاع اني ارتبط بالشخص المناقض لي علشان نكمل بعض دي خرافة وان ده سبب رئيسي من أسباب الانفصال، وان الشاهد العيان ليس دائمًا صادق حتى إن اعتقد الشاهد نفسه بذلك، وان اجهزة كشف الكذب اللي بتستخدمها الاجهزة الأمنية حتى الآن ليست دقيقة إطلاقاً.

الكتاب دائماً بيذكر امثلة من السينما بتوضح تأثيرها بتلك الخرافات، وانها كانت أيضاً أحد الأسباب اللي ساهمت في نشر تلك الخرافات.

الكتاب بينتهي بدعوة لكل علماء العلوم انهم يؤلفوا كتب زي دي في كل مجال، زي الطب مثلاً.

التقييم 5/5

كتاب مكتوب بلغة بسيطة بيشرح بشكل عام وسريع مراحل تطور معرفتنا بالكون من حيث الزمن والمكان.

وكمان الكتاب مقدمته بتناقش الفترة لما كان العلم له نظرة للكون ووضع كوكب الارض وشكلها، ولما جه كوبرينيكوس وجاليليو، وازاي انه ممكن جداً يكون العلم متفق على حاجة ويثبت خطأها بعد ذلك، زي اللي عمله نيوتن ثم اينشتاين ثم ظهور نظرية ميكانيكا الكم.

الكتاب شيِّق، رغم انه استخدم تشبيهات كثيرة علشان يحاول يوضح النظرية العلمية ولكن كان في اماكن كتيرة القراءة صعبة عليَّ خاصة الثلث الاخير من الكتاب.

التقييم 3/5

بعد رواية 1919 لأحمد مراد كنت قررت اني مش هاقرأ تاني له. ومرت فترة كبير فعلًا على صدور أرض الإله ولم اشتريها. ولكن بعد مدة قولت بما اني متابع احمد مراد من اول “فرتيجو” يبقى مفيش مشكلة اني اتابع رحلة الكاتب عبر رواياته وتطور اسلوبه.

الرواية مش شيقة زي مثلاً الفيل الازرق أو تراب الماس، ولكن فيها حاجتين حلوين اوي، اولاً اللغة المرة دي حلوة اوي وثانيًا هو تخلي احمد مراد عن الاباحية الاوفر في الرواية.

طبعًا الرواية مش بحث تاريخي، فلو انت ناوي تصدق الرواية على انها تاريخ يبقى انت جاي تهزر، وده بالمناسبة نفس رأي احمد مراد.

الغلاف طبعًا تحفة (رغم ان مش ده غلاف الرواية ولكن انا بحب الغلاف ده اكتر)، ولكن مشكلتي مع الغلاف انه فرض تصوّره ككاتب عليها من حيث شكل الأبطال. انا بحب انا اتخيَّل شكل الشخصيات وعلشان كدة مش بحب الغلاف اللي بيظهر فيه شخصيات واقعية خاصة بوجهها.

التقييم 5/5

طعام (إيطاليا).. صلاة (الهند).. حب (ماليزيا).

الكتاب عبارة عن مذكرات شخصية للكاتبة إليزابيث جيلبرت بتبدأ بعد فترة انفصالها عن زوجها. وتبدأ بإيطاليا ومحاولاتها لتعلُّم اللغة الإيطالية، ومن ثم سافرت للهند للبحث عن جانبها الروحي بعدما اشبعت جانبها الجسدي في إيطاليا. وتنتهي بها الرحلة في ماليزيا، حتى وجدت الحب التي كانت تبحث عنه طوال عمرها.

الكتاب لغته شيقة. وجميل اوي. اظن هايخليك تبص بشكل مختلف لنفسك.

تم انتاج فيلم يحمل نفس الاسم بطولة الجميلة جوليا روبرت.