التقييم 5/5
الرواية أحلى من الفيلم، والكوميديا فيها أكتر من الفيلم. ولكن إحقاقاً للحق، الفيلم رائع أيضاً.
رحلة مؤثرة جمعت بين حبيبين تفرقهما الموت بعد معاناة طويلة مع مرض السرطان. حاول كبح دموعك أثناء القراءة.
التصنيف: رواية
-
التقييم 3/5
بعد رواية 1919 لأحمد مراد كنت قررت اني مش هاقرأ تاني له. ومرت فترة كبير فعلًا على صدور أرض الإله ولم اشتريها. ولكن بعد مدة قولت بما اني متابع احمد مراد من اول “فرتيجو” يبقى مفيش مشكلة اني اتابع رحلة الكاتب عبر رواياته وتطور اسلوبه.
الرواية مش شيقة زي مثلاً الفيل الازرق أو تراب الماس، ولكن فيها حاجتين حلوين اوي، اولاً اللغة المرة دي حلوة اوي وثانيًا هو تخلي احمد مراد عن الاباحية الاوفر في الرواية.
طبعًا الرواية مش بحث تاريخي، فلو انت ناوي تصدق الرواية على انها تاريخ يبقى انت جاي تهزر، وده بالمناسبة نفس رأي احمد مراد.
الغلاف طبعًا تحفة (رغم ان مش ده غلاف الرواية ولكن انا بحب الغلاف ده اكتر)، ولكن مشكلتي مع الغلاف انه فرض تصوّره ككاتب عليها من حيث شكل الأبطال. انا بحب انا اتخيَّل شكل الشخصيات وعلشان كدة مش بحب الغلاف اللي بيظهر فيه شخصيات واقعية خاصة بوجهها.
-
التقييم 5/5
لا يجوز أن تلعني أي شيء يهطل من السماء، حتى لو كان مطرًا.
فمهما كان المطر غزيرًا، ومهما كانت السماء مُلبّدة بالغيوم، أو مهما كان الجليد يكسو سطح الأرض، لا يجوز أن تتلفظي بكلمات نابية لأي شيء تخبئه لنا السماء. الجميع يعرفون ذلك، بما فيهم زليخة.
إليف شافاق من الناس اللي انا حابب اني اقرا كل اعمالهم. بتعرف ازاي تكتب حكاية. وبتنغمس معاها، ومع شخصياتها وأماكنها وأكلاتها.
الرواية تناقش الجانب المؤلم من العلاقة بين تركيا والأرمن من خلال عائلتين واحدة تركية والأخرى أرمانية رغم ان اصول العائلتين واحدة.
اسماء فصول الرواية هي مكونات طبق “العاشوراء” الذي يحبه مصطفى.
إن الأغلبية الساحقة من الناس لا يفكرون مطلقًا، والذين يفكرون لا يصبحون الأغلبية الساحقة أبدًا، فاختاري في أي فئة تريدين أن تكوني.
بسبب الرواية اترفع على إليف شافاق قضية في المحكمة واتحكم عليها بثلاث سنوات سجن، ولكن تم العفو عنها وإيقاف الحكم.
-
التقييم 4/5
قرأت الرواية وانا فاكر انها رواية قائمة بذاتها، ولكن للأسف في آخر الرواية اكتشفت انها الجزء الاول من سلسلة لسة الكاتب لم ينتهي من كتابتها، وده شيء مش بحبه.
ميزة حسن الجندي ككاتب رعب، انه بيعرف يكتب رعب مصري أوي. بيعرف يقطع الاحداث في النص ويكمل في احداث تانية وبعدين يرجع يربط بين الاحداث تاني.
انا لاحظت في الرواية انه ذكر شخصية صحفية حاولت تعمل هي واصدقائها فكرة برنامج بيروح يصوَّر في اماكن مهجورة مشهور عنها انها مسكونة بالجن، وبالتالي هما بيبقى مهمتهم انهم يكشفوا حقيقة الموضوع ده. الفكرة ان في احد لقاءات حسن الجندي في الراديو (محطة 9090) مع المذيع أحمد يونس قال انه كان فعلًا بيحاول يعمل برنامج بالفكرة دي ولكنه مكملش (الحلقة تقريبًا كانت في سنة 2016).
لو قلبك خفيف فأنا بنصحك انك متقراش أي حاجة لحسن الجندي.
الكاتب في فيديو على اليوتيوب قال ان الرواية هي الجزء الاول من سلسلة من سبع (7) اجزاء!
عجبني الغلاف، ولكن المربع الاصفر ده حسيته انه شاذ على التصميم.
-
التقييم 5/5
الارض هايضربها نيزك، والنتيجة هي الظلام التام. ازاي بقى الناس هايتعاملوا مع بعض؟
عالم موازي جميل خلقه أحمد خالد توفيق. عالم امتلاك فيه قداحة (ولاعة) هي جريمة تستوجب الموت.
النهاية غير مُتوقعة.
-
التقييم 5/5
الجنون. ده الوصف اللي حسيته اثناء قراءه الرواية.
الأحداث سريعة أوي، طول الوقت انت بتجري وراء البطل والاحداث. الترجمة والتوضيحات اللي حطها د. أحمد خالد توفيق سهلت قراءة الرواية.
اللي قرأ رواية “نادي القتال” -ترجمة أحمد خالد توفيق ايضاً- هايبقى واخد شوية على الاسلوب بتاع الكتابة ده.
ليه مفيش من الروايات دي كتير. وليه مفيش مترجمين في الادب ده كتير؟!
رواية حلوة أوي. وممتعة اوي. لازم تقرا الرواية على مرة واحدة أو مرتين بالكتير اوي علشان تبقى متابع الاحداث ومتهربش منك.
-
التقييم 3/5
أول رواية يكتبها الكاتب الكويتي “سعود السنعوسي”، الرواية غريبة في بدايتها، ولكن بعد ذلك ستفهم الأحداث وتشابكها.
هي قصة حب يسردها الحبيب للدكتور النفساني الذي يعالجه.
لا بأس بها. لم أفهم سبب الاسم أو الغلاف.
-
التقييم: 5/5
أشهر رواية للكتابة فرنسين ريفرز.
الرواية عبارة عن محاكاة لقصة من الكتاب المقدس (العهد القديم تحديدًا) بتتكلم عن النبي هوشع وزواجه من سيدة زانية. الرواية ليست دينية.
الرواية رائعة بشكل كبير، الشخصيات والاحداث والترجمة.
سبق وقرأت روايتن للكاتبة: “صوت في الريح”، “صدى في الظلام” وهما الكتاب الاول والثاني من سلسلة “علامة الأسد”.
قراءة الرواية هاتخليك تبص لموضوع الزواج بشكل مختلف.
-
التقييم ٤/٥
مجموعة قصصية رائعة -كالعادة- لأحمد خالد توفيق.
الأفكار جديدة بالنسبة لي خلتني مستمتع بالقراءة، القصص اللي عجبتني:
– تيك توك
– الكراهية
– هيام (حسيت اني اخدت مقلب حلو)
– لست وحدك (كانت مقلب برضوا)
– ليلة شتاءمعجبتنيش قصة “شخص مهم”، ومفهمتش وضع آخر قصة!
استغربت ان اسم الكتاب “لست وحدك” مع انه كان ممكن يبقى تيك توك أو كراهية أو هيام.
بالنسبة للغلاف، مش عارف أقول إيه، دي صورة ستارة ولا رسمة السيراميك بتاعة بيت المصمم ولا إيه بالظيط!
-
التقييم 5/5
منذ فترة وأنا أشتاق لقراءة أعمال تولستوي وديستويفسكي وديكينز وهوجو وغيرهم من عمالقة الأدب، ولكن لأن مؤلفاتهم ذات ترجمات جافة وأسعار باهظة، فلم أقرأ لأحدهم أقصوصة ورقية! ولذلك أشكر دير السيدة العذراء البرموس بالإسكندرية والمتُرجمين لتوفير مثل هذا الكتاب وبسعر “25 جنيه” فقط.
كل قصص الكتاب تدور حول موضوع واحد “المحبة”، وأعجبتني أكثر من قصة، قصة صانع الأحذية الذي انتظر السيد المسيح ليزوره، وقصة العجوزان، وقصة الملاك الذي امتهن مهنة صناعة الأحذية. ولكن في قصة “الناسك” أحسست أنها أطول من اللازم ولكن لا أنكر انها تنم عن بصيرة ثاقبة في النفس البشرية.
غلاف الكتاب جميل ولكن لا أعرف مدى ارتباطه بالكتاب!